في المغرب كنعيشو واحد الظاهرة خطيرة ولكن الناس ما كايعطيوهاش الأهمية اللي تستاهل 🤷‍♂️
بزاف ديال الشركات - الإدارات وحتى الناس في ديورهم كايركبو كاميرات المراقبة من نفس النوع ونفس البراند "اللي متأكد دابا طاحو عليك سمياتهم في راسك 🙂" ولا شي موديلات صينية مشهورة بثمنها الزهيد وسهولة تركيبها.
هادشي كيبان في الأول عملي ومزيان ولكن تقنيا هادي كارثة أمنية كبيرة.
{+} غادي تسولني علاش 🤔
حيث منين كتكون الأجهزة كلها من نفس النوع كتولي أي ثغرة أمنية في داك البراند عندها القدرة تضرب آلاف الكاميرات في مرة وحدة.
تصور معايا شي CVE جديدة خرجات فيها Remote Code Execution بلا حتى ما تحتاج شي auth، شي وحدة بحال نيت الثغرة اللي تعطاها المعرف رقم : CVE-2021-36260.
راه أي هاكر إقدر إوصل للكاميرات ديال آلاااااف المغاربة وإختارقهم وإدخل يشوف التصاور - يحرك الكاميرا - ولا يستعملها باش يدخل للشبكة الداخلية بحالها بحال الباب اللي ساهل دخل منو.
واللي كيزيد الطين بلة هو أن بزاف من هاد الكاميرات الناس كايخليو فيها Default passwords أي كلمات السر الإفتراضية وكايبقاو خدامين بنفس الإعدادات اللي كايحطها التقني في نهار التركيب ومكايتبدلوش.
زد على هادشي أن البراندات الصينية بالخصوص معروف عليها أنها كترسل الميتا داتا للسيرڤورات اللي برا وشي مرات كايكون فيها Backdoors معمولة من المصنع، وهنا مابقاش غير الخطر داخلي، ولى حتى خارجي وكيهدد السيادة الرقمية ديال البلاد.
منين كايكون عندك نفس النوع - نفس الإعدادات - نفس طريقة التركيب راه كاتسهل حتى على شنو كيتسمى بالMass scanning عبر أدوات بحال Shodan ولا Censys والهاكرز كايبداو إقلبو على IPs مغربية بكاميرات من نفس النوع وإقادو لائحة ديال أهداف ساهلة بلا حتى ما يتعدب.
هنا كتولي الهجمات مشي مستهدفة ولكن شاملة وعشوائية كيفما كايديرو البوتات، راه تصور غير شركة صغيرة فيها 20 كاميرا من نفس النوع ومربوطين بنفس الشبكة إيلا تضربات وحدة منهم غادي تولي نقطة دخول لأي هاكر باش يتقدم في الشبكة وإدوز لباقي الأجهزة.
{+} غادي تسولني وأشنو هو الحل 🤔
الحل هو أن أي واحد كايركب كاميرات خاصو يكون واعي بأن الأمن السيبراني بدا من لحظة الإختيار ديال البراند خاص التنويع في الموديلات - التحديثات الدورية للFirmware - تبدال كلمات السر - قطع الوصول المباشر من الإنترنت - وإستعمال firewall و VPN داخلي، ودير في بالك باللي راه الكاميرا ماشي غير عين كتشوف بيها بل تقدر تولي نقطة ضعف اللي غادي تحل ليك دارك أو شركتك كاملة للأنترنيت الأسود.
====
وفي الأخير شكرا لأنك وصلتي حتال لهنا وقريتي البوسط، متنساش تنشرو مع صحابك وتابعنا باش توصل بجديد الصفحة ✌️